孖《膠戰》好友拍瘋狂MV 呂爵安讚阿正「大粒墨」造型無得輸


呂爵安（Edan）周五（25日）假亞博舉行3場個人演唱會，趕在演唱會前推出兩首新歌《Again！》與《霸道總裁》，他邀得ViuTV節目《膠戰》好友岑珈其、徐浩昌 （肥腸）和黃正宜（阿正）拍攝《Again！》MV放笑彈。


Edan表示此歌是一首好溫暖的歌，「做人開心唔係咁簡單，但呢個世界好多人都陪住你，好多嘢可以重新嚟過，一齊去努力令到件事變得更加好」。他稱人生總有不如意事，相信有信念，有人陪伴就有力量邁步跨過去。


《Again！》MV大玩瘋狂搞笑mode，Edan稱「6膠」是不二人選，「一諗就好啱《膠戰》嘅朋友，特別啱肥腸、珈其同阿正，Hillary（劉沛蘅）同Jeffrey（魏浚笙）就唔係好啱角色，我同佢哋講，唔好意思，你哋太靚，下次先！」他們MV的造型花盡心思帶來驚喜，為突顯阿正的奸角，特別在她嘴角上黐了一大粒墨，Edan大讚阿正非常襯「大粒墨」造型。